Звернення закарпатських русинів (по русинськи)

Честовані жытелі Закарпатя! У пуслідный час на Закарпатю став ся цілый шор трывожных трафункув, котрі не можуть лишити нас, русинув - коріных жытелюв края, спокуйныма и равнодушныма. То, што трафило ся у центрі Мукачева 11 юлія 2015 рока, вчиненя спецоперациі силовых структур на териториі Закарпатя, выстрілы в охраника желізнодорожного тунеля через Карпати, вызвало недовольство мирного населеня и страх перед угрозов насильства. Засобы масовоі информациі, ги се чинять фурт, надали шор версий штодо причин даных дійств, в тому числі просліджовали ся спекуляциі на тему русинського вопроса. Исторично вчинило ся так, што Закарпатя – се регіон из національнов и релігійнов толерантностьов. Наша область граничить из чотырма державами, што и одбило ся на формированю своєрудного менталітета жытелюв йи, избраню нима способа зароботка и прожытя. Не обзеравучи ся на гнівні заявы руководства державы и области, штодо присутствия масового криміналітета на Закарпатю, треба бы обернути позур на то, што за рокы независимости Украйины на Закарпатю розпали ся майже всі заводи и фабрикы, булшость жытелюв области стратили можность годовати фамилиі. Люде зачали глядати самостоятелно выход из даноі ситуациі и десь майже 75- 80 % населеня Закарпатя, валовшного робити, вийижджавуть на зароботкы за гатар, близь 7-8 % займавуть ся вырощованьом агропродукциі, котру реалізувуть в западных и централных областях Украйины и лем мала часть населеня залучена до контрабандных дійств на гатарах из Європейськым Союзом, и, ги нам ся видить, из благословеня и керовництва чиновникув державного уровня. Мы, Русини Закарпатя, возмущені заявами из боку вшылякых украйинськых політикув штодо населеня нашого краю, бо они при сьому не зробили за 20 рокув ани цяткы, жебы обезпечити жытелюв області робочыма містами. При сьому нам, жытелям Края, треба сокотити спокуй, як и сокотити ся разного роду провокаций, діла мира и горазда про будущі поколіня. Не позволиме перечинити нашу землю на театер бойовых дійств, не допустиме спалити и розбити варошы и села. Краяне, всокотиме Закарпатя про нащадкув! Представитель русинов од Украйины в Світовуй раді русинов - Микола Бобинець Голова обласного общества им.А.Духновича - Юрій Продан Голова НРПР - Микола Староста Потолковав з українського язика Юрій Шипович.