ПОЛОЖЕНЯ про подкарпатську русинську премию имени И.Ю. Петровція

І. Загальні положеня1. Подкарпатська русинська премия имени И.Ю. Петровція (дале - Премия) запроважена Крайовым обществом подкарпатськых русинов. 2. Основныма цілями запроваженя премиі є: подпора розвоя днешньо русинськоі поезиі, популяризация творчества русинськых поетув, популяризация русинського языка через поетичні творы и приміры товмацтва на русинськый язык май файных образцюв світовоі поезиі, вчиненя доброі атмосферы про розвой творчоі особистости. 3. Премия присужує ся за майбулш талантливі стихы, поемы, товмацтва, вчинені у хоть-котрому жанрі (інтимна, пейзажна, гражданська лірика и тд.). При сьому учитує ся популаризация собственных творув самым автором: число изданных зберьок, презентованя поетичных творув и товмацтв у интернеті (сторінка на фейсбуці, блог на сайті¸ свуй поетичный сайт).. 4. Премия присужує ся русинськым поетам и товмачам, жытелям Подкарпатя/Закарпатя, вадь поетам, котры жывуть у другых регионах Украйины, айбо пишуть по-русинськы и йих творы трафлявуть под положеня про подкарпатську русинську премию имени И.Ю. Петровція. 5. Премия призначать ся у єднай номінациі «Русинська поезия и товмацтво». Премия нараховує ся у розмірі 5000 (пять тисяч) грн. 6. Премия присужує ся на конкурснуй основі за творы, котрі набрали майбулше балув, выставленых журі. 7. Премия присужує ся єден раз на рук. 8. Премия присужує ся автору єден раз за жытя. 9. Поданя на Премию надавуть самі авторы. 10. На Премию высувавуть ся нові авторські творы, оприлюднені у конечному виді подовж послідных пять рокув, айбо не пуздніше, ги за два місяці до йих высунення на здобытя Премиі.ІІ. Організаційный комітет из пудготовкы и врученя русинськоі премиі имени И.Ю. Петровція.1. Діла пудготовкы и проведеня конкурса, організациі врученя Премиі вчинять ся Організаційный комітет из присуженя русинськоі премиі имени И.Ю. Петровція (дале – Організаційный комітет), у котрый заходять представытелі КОПР, активісты другых русинськых організаций, представникы спонсора премиі, літературні критикы и културні діятелі Подкарпатя. 2. Організаційный комітет создає робочу групу, яка вчинює поточну роботу из подготовкы конкурса. 3. Функциі Організаційного комітета и робочоі групы: розробка календарного плана заходув штодо пудготовкы и проведеня конкурса творув, наданых на Премию, и організациі премийованя; пошыреня информациі про проведеня конкурса, условия участи; адміністрованя и контент-наповненя Интернет-сайта (блога ци сторінкы на фейсбуковикови) курса на русинську премию имени И.Ю. Петровція; вызначеня и затвердженя числа и персонального состава журі; забезпеченя можности связи из авторами, прийнятя од авторув робот діла участи у конкурсі; вчиненя пудготовкы конкурсных творув про забезпеченя роботы журі; вчиненя пудготовкы бюлетенюв про голосованя членув журі; оприлюдненя резултатув роботи штодо призначеня Премиі; організация церемониі врученя Премиі; вчиненя иншоі роботы, штодо успішного проведеня захода. 4. У случайи недодержаня норм сього Положеня Організаційный комітет має право одхилити учасника од участи в конкурсі без поясненя причин.ІІІ. Журі1. Діла вызначеня лауреатув Премиі Організаційным комітетом создає ся компетентноє журі, до котрого кличуть ся компетентні літературознавци и критикы, а такой русинські културні діятелі, писателі. 2. Роботу журі возглавляє обраный його членами голова, котрый координує свою роботу из головов Організаційного комітету. 3. Календарный план свойи роботы журі погожує из Організаційным комітетом. 4. Члены журі розпозірувуть всі представлені Організаційным комітетом творы у каждуй номінації окремо, обєктивно оціньовуть йих ціну и фіксувуть своі оцінкы у бюлетнях тайного голосованя. 5. Журі має право за одсутности творув высокого професійного уровня не вызначати переможця – лауреата Премиі. 6. Всі засіданя журі фіксувуть ся у протоколах.ІV. Условия поданя робот на премию1. Положення про подкарпатську русинську премию имени И.Ю. Петровція оприлюднює ся головов КОПР через сторінку у фейсбуці, на сайті СКР, а такой печатать ся у културно-белетристичному часописі «Голос русина» 2. До участи у конкурсі допускавуть ся творы за номінацийов: «Русинська поезия и товмацтво» 3. Творы мавуть быти надані у Організаційный комітет у термін, вызначеный даным Положеньом, у выгляді, готовому до презентованя. 4. Твори надавуть ся за актами из 10 фебруара до 10 апріля включно на e-mail: [email protected]. 5. Учасникы конкурса мавуть собственоручно надати свойи творы до Організаційного комітета. 7. Учасникы надавуть до оргкомітету такі документи: копія паспорта; портфоліо автора; повный адрес, номеры телефонув, у тому числі мобільного, icq, e-mail; одзывы в пресі на вже печатані творы автора(копиі); зноскы на интеренет-ресурс, на котрому автор фуртошно выкладує своі поезиі и товмацтва.V. Порядок выбраня переможцюв1. Подані на конкурс творы журі розпозірує из 11 апріля до 23 апріля и заканчує роботу 24 апріля. 2. Члены журі ознакомлювуть ся з творами и у каждуй номінациі, окремо выставлявуть у бюлетнях діла тайного голосованя оцінкы (балы) за 12-бальнов шкалов каждому представленому на конкурс авторови. 3. Балы, што выставлені членами журі, рахувуть ся окремо по каждому учасникови и вносять ся до протокола. 4. За результатами голосованя у каждуй номінациі (кедь такых є булше) опреділять ся переможець, якый набрав майбулше балув. 5. У случайи проголосованя єднакого числа балув, повторно вчинять ся переголосованя, айбо вже тайно. 6. За резултатами голосованя складавуть ся протоколы, што завірявуть ся пудписами всіх членув журі.VІ. Нагороженя переможцюв1. Особам, удостоєным Премиі, кроме грошовоі части, присвоює ся звання Лауреата подкарпатськоі русинськоі премиі имени И.Ю. Петровція и вручать ся Почесна табла переможця. 2. Премию лауреатови вручать голова Крайового общества подкарпатськых русинов.VІІ. Фінансованя конкурсаФінансованя конкурса вчинять ся за рахунок спонсорув.VІІІ. Офіційна информация про одзначеня подкарпатськоі русинськоі премиі имени И.Ю. Петровція Офіційна информация про одзначеня Премиі, ход проведеня и выводы конкурса на подкарпатську русинську премию имени И.Ю. Петровція розміщать ся сторінци фейсбука головы КОПР, на сайті СКР, а такой печатать ся у културно-белетристичному часописі «Голос русина». Голова Крайового общества подкарпатськых русинов Микола Бобинець