ЧитаютКомментируютВся лента
Это читают
Это комментируют

Новости и события в Закарпатье ! Ужгород окно в Европу !

Из истории Подкарпатской Руси. Зборы 8/ V, 1919. в Ужгородѣ.

    29 марта 2024 пятница
    Аватар пользователя Нискореный русин
    Зборы 8/ V, 1919. в Ужгородѣ. Був то ясный сонечный маевый день. Залю жупаната наповнили делегаты мѣстных рад. Найбольше их прийшло из близших сел. Але було 7 делегатов из Мараморошскоѣ рады. Були там заступники Пряшовскоѣ рады, принесшѣ лист дра А. Бескида и заступники Лемковщины, котра також бажала приключитися до Подкарпатской Руси. Кромѣ того брали участь в зборах и два делегаты Амер. Руси. Перед зборами в еписк. храмѣ одкончена св. Литургія, послѣ котроѣ посвятили мы торжественно (др. Г. Шуба) наш прапор и потому в жупанатѣ одбулися зборы. Проспѣвали мы наш народный гимн »Подк. Русины«, я отворив зборы, подавши информаціѣ о политичной ситуаціи, витав делегатов, заступника Чсл. правительства, жупана Мойша, заступников ам. Руси и гостей. Потому слѣдовали рефераты о територіи, о планѣ автономіи, о школьных дѣлах и пр. Зборы однодушно выповѣли, що принимають рѣшеня Am. Русинов и требують, щобы мирова конференція прилучила Подкарпатску Русь к Чел. Републицѣ под сими головными условіями: 1) щобы Подк. Русь соединяла в собѣ всю руську територію Подкарпатя, 2) щобы була забезпечена для нас найширша автономія. На питаня Гр. Жатковича, чи є дакто против того рѣшеня, не зголосився никто. Зборы одбулися святочно, без жадного инциденту. Одушевленно витав народ промовы заступников поодиноких рад, привѣт заступника правительства жупана Мойша, особливо же привѣты Амер. делегатов. Выбрано 30 членову Центр. Руську Нар. Раду и 8-членову президію. Председателем стався п. др. Ант. Бескид, подпредсѣдателем А. Волошин и др. Мих. Бращайко. Рѣшеня сих для нас историчных зборов понесла дня 20. мая до Праги — по рѣшеню зборов — одна 100-членова депутація, котра була в Празѣ витана дуже щиро и тепло. Прага була украшена прапорами державы и нашими. Члены депутацій були гостями столичного города Праги. Дня 23. мая рано в храмѣ св. Вита на Градчанах одслужив теперѣшный наш єпископ Петро Гебей св. Литургію, а потом о 10. год. перед обѣдом одбулася наша торжественна авдіенція у п. президента Т. Ґ. Масарика. При. той нагодѣ говорили др. А. Бескид, др. Гр. Жаткович и Авг. Волошин. Пан президент перебравши протокол зборов наших нар. рад и меморандум наш, заявив свою радость, що наш народ з таким довѣріем односиться до республики, говорив о кроках, якѣ он робив для освободженя Подкарпатской Руси за границею вже в первых роках войны, о ситуаціи на мировой конференціи и бажав нам всего найкрасшого. Разом и напоминав нас, що чекає нас много працѣ, яка требує много любви до народу и лиш з взаимным довѣріем к другим чинникам державного житя можемо досягнути повных успѣхов. Для близших переговоров запросив президент членов Рады до себе на 3. год. по полудню. Там подробно поговорено справу границь, автономіѣ и пр. Из Праги вернулися мы назад з тою певною надѣею, що Подкарпатська Русь йде на встрѣчу красшоѣ, лѣпшоѣ будучины. http://rusinmaromorosh.livejournal.com/120393.html