Білі Хорваты.

Племена, або первісно сарматьского або аланьского (іраноязычного) походжіня. По першыраз ся споминають імператором Візантії Конштантіном VII. Порфіроґенетом (Багрянородным) (905 - 9.11.959) в его роботі De administrando imperio (О справованю імперії). Пришли на місто Антів, переможеных в 6. ст. н. е. Ава­рами. Установили свою владу над Славя­нами на значній теріторії Выходной і Централной Европы од вышнего току Дністра, Червеньскых міст, вышнего току Віслы і Сана, северных і южных схылів Карпат по землі Лужіцькых Сербів, Слезька і северо-выходных Чех. У 626. р. Білы Хорваты были закликаны візантьскым імператором Іракліём (610-641) на поміч Візантії протів Аварів, обсаджуючіх Конштантінополь. Значна часть воджатаїв Білых Хорватів прияла позваня імператора і зо своїма войсками перешли поздовж Дуная на теріторію Візантії і напали тыл Аварів. Вдяч­ный імператор поселив Білых Хорватів в Іллірії, де установили свою владу над містныма Славянами, дали їм мено, Хорваты. Часть Білых Хорватів зістала жыти на северных схылах Карпат, але їх сила ослаб­ла, хоць племінне обєдиніня під їх владов продовжовало екзістовати, зіставаючі в тіни боёвнішых Франків і Аварів. В тім часі, в 7.-8. ст. ся цалком славянізовали. Покорены были в послідній третині 9. ст. великоморавскым князём Святоплуком (871-894), якому спершу платили трібут, дань за мір. Іх выходну галузь (очівидно выходославяньске племено, жыюче на вышнім тоці Дністра, приявше мено своїх покорителів, Білых Хорватів) знав автор давнёруського літопису Повесть времен­ных лет як споєнців кієвского князя Олега (?-912), в другім припаді як повставшых протів влады князя Владіміра в 992. р. і покореных ним. Славянізованы Білы Хор­ваты заселяли тыж южны схылы Карпат і передгорья. Історічна традіція веде зача­ток Підкарпатьскых Русинів од Білых Хор­ватів і їх племенного обєдиніня. Южнокарпатьска часть Білых Хорватів, впливом ґеоґрафічных условій, находивши ся за великым гребінём Карпат, не была участна при формованю штату выходных Славян, Кієвской Руси, і не мала з нёв ниякых політічных контактів ани в часі влады князя Владіміра, ани пізніше. В 11. ст. назва Бі­лы Хорваты на юг од Карпат цалком ісчезать, місто ней ся родять терміны "Руси­ны", "Руснакы", "Ruthenі".