Добавить комментарий

28 юнія высоко у Карпатах на горі Кременець (1221 м над морём) под еґідов Світовой рады русинів одбылася інтерреґіонална русинська молодежна акція ”Карпатські русины – єден нерозділный народ!”. Туй, на самому верьхові, де ся сходят гатары історичных карпаторусинськых реґіонів – Пряшівськой Руси, Лемковины и Подкарпатськой Руси, а днесь ся стыкавут державні границі Словакії, Полщі и Україны, стрітили ся активісты общественных орґанізацій, студенты, выпускникы и ученикы русинськых неділных школ, и то вецце ги сорок чоловік, котрі прийшли из Ужгорода, Мукачова, Иршавы, Волівця, В.Березного, Пряшова, Снины, Свидника, Межилаборець, Братіславы, из-под Кракова и другых сел и варошів, де жыют русины. Моложава уйшла горі на Кременець под русинськыма прапорами, трьома путичками – из Словакії, Полщи и Україны. Сходжіня – доста тяжкоє, бо мусай было ити дгорі пішо коло 12-18 км.
На горі наша молодеж (а до того и учасникы старшой ґенерації) дали собі одпочити, а дале, и то на очах многых туристів из Чехії, Швеції, Полщі, Словакії и др. держав, дали імпровізованый концерт, почас котрого читали стихы русинськых поетів, співали народні співанкы. На горі мож было видіти и лавреата межинародной премії им. А.Духновича поета Штефана Сухого, выдавателя русинськых книг кандидата наук Валерія Падяка, новинарьку Сілвію Лосінову, активіста русинського двиганя у Словакії Петра Крайняка-молодшого, співака Ивана Крафчика, професора Йозефа Cіпко з Пряшівського універсітета. и др.
Делеґація из Словакії вручила русинам Подкарпатя прапор Європського Союза.
Почас акції молоді люде узяли ся за рукы, обы символізовати, што мы – єден народ. Учасникы молодежной акції уголосили „Кременецьке проголошіня”, де задекларовати своє виджіня новых реалій Європы. Туй ся почасти прогололошує: „Мы – молоді русины, руснакы, лемкы, привітствуєме ідею входжіня молодых централноєвропськых держав в Європську Унію, котра вызнає русинську народність. Мы убертаєме ся ид власти Україны – вызнати у себе в державі народність „русин”. Бо лем таку Україну, де ся поважавут права мінорітных народів, може тримати за повноправного члена Європськый Союз. Мы убертаєме ся ид Європській Унії – изробити усе можноє, обы шенґенська границя не стала в історії Європы новым „берлінськым муром”! Мы, молоді карпаторусины, узяли ся за руки, обы выголосити своє право стрічати ся, мати общі акції, нащивляти єден другого, бо мы – єден нерозділный народ!”. Інформує прес-центр Ужгородського Общества им. А.Духновича.