Добавить комментарий

Карпатські русины – єден нерозділный народ!
Проголошіня першой інтерреґіоналной стрічі русинськой молодежи на горі Кременець, 28 юнія 2008 рока

Карпатські русины – реалність сучасной Європы. Мы – жывый народ. Мы жыєме на своїв земли – земли нашых предків. Мы (русины, руснакы, лемкы) – рідні браты и сестры, хоть межидержавні кордоны, ги по жывому тілу, фалатувут на части наш народ, и нашу історію, і нашу общу долю. Вецце раз за послідні сто років мы пережыли траґічні моменты карпаторусинськой історії – ґеополітичні зміны почас Першой світовой войны, выселіня нашого народа до чужого края почас варварськой операції «Вісла”, радянськый тоталітаризм, котрый запрітив и саму нашу народність – быти русином. Мы пережыли „берлінські муры”, котрі ізолёвали Подкарпатську Русь (Закарпатську область) од другых русинськых теріторій, и котрі ізолёвали ушиткых карпатськых русинів у так называнім „соціалістичнім лаґрі” од реалій Європського контінента, хоть од віка мы усе были частёв Європы и такими опстаєме – жыєме у її ґеоґрафічнім центрі.
Мы жыєме у часы новых ґеополітичных змін, краха тоталітаризма, возроджіня незалежных держав, творіня Європськой Унії и її ширіня. Карпатські русины Польщі, Словакії, Румунії, Мадярщины вызнаті як народ, вони суть повноправні гражданы Європськой Унії. Нарубы, подкарпатські русины в Україні, котра неє членом Європськой Унії, уже 17 років опставут у сюй державі неузнані як народ. А новый шенґенськый гатар, як то уж было в карпаторусинськів історії, назад фалатує, розділює єден народ на части.
Мы, русинська моложава, изыйшли ся на горі Кременець, де ся сходят гатары історичных карпаторусинськых земель – Пряшівськой Руси, Лемковины и Подкарпатськой Руси (державні границі суверенных держав Словакії, Полщі и Україны), обы задекларовати своє виджіня реалій Європы, котра ся ширить, и своє природноє право жыти у новій Європі як єден нерозділный народ. Мы – молоді русины, руснакы, лемкы, привітствуєме ідею входжіня молодых централноєвропськых держав в Європську Унію, котра вызнає русинську народність. Мы убертаєме ся ид власти Україны – вызнати у себе в державі народність „русин”. Бо лем таку Україну, де ся поважавут права мінорітных народів, може тримати за повноправного члена Європськый Союз. Мы убертаєме ся ид Європській Унії – изробити усе можноє, обы шенґенська границя не стала в історії Європы новым „берлінськым муром”! Мы, молоді карпаторусины, узяли ся за руки, обы выголосити своє право стрічати ся, мати общі акції, нащивляти єден другого, бо мы – єден нерозділный народ!
г. Кременець, 28 юнія 2008 р.